የከተማችን ቆነጃጅትና የወይባ ጢስ!

• • የወይባ ጢስ የወሲብ ብቃትን ያሻሽላል -
  • የወይባ ጢስ ቤት ባለቤት ተፈጥሮአዊውን የማህፀን ፈሳሽ ስለሚያደርቀው ለኢንፌክሽን ያጋልጣል - የማህፀንና የፅንስ ስፔሻሊስት

               በወሎና አፋር አካባቢዎች በስፋት የተለመደ ነው፡፡ ለአካባቢው ነዋሪ ሴቶች ውብ ፊትና ጥርት ያለ ቆዳ ምስጢሩ እሱው ነው፡፡ ሴቶቹ ለውበታቸው፤ ለቆዳቸው አብዝተው ይጨነቃሉ፡፡ ወደእነዚህ አካባቢዎች ለሥራም ሆነ ለሌላ ጉዳይ ብቅ የሚሉ ሁሉ በሴቶቹ ውበት መደነቃቸው አይቀሬ ነው፡፡ አንዳንዶቹም ከመደነቅ አልፈው የሴቶቹ ውበት ምስጢር የሆነውን የጢስ እንጨት ይዘው ወደመጡበት ይመለሳሉ፡፡ እንጨቱ በአካባቢው ወይባ፣ ደደሆ፣ ቆቆባና ምስሮች በሚሉ መጠሪያዎች ይታወቃል፡፡ የእንጨቱ ቀለም ወደ ቢጫነት የሚያደላና ዘይትማ ባህርይ ያለው ነው፡፡ እንደተለመዱት የማገዶ እንጨቶች ቦግ ብሎ የመንደድ ባህርይ የለውም። ዝግ እያለ የሚጤስና የጭሱ ሽታ ለአፍንጫ ጥሩ ስሜትን የሚሰጥ አይነት ነው፡፡ ሁሉም እንጨቶች እንደየአይነታቸው የሚሰጡት ጠቀሜታም የተለያየ ነው፡፡ ወይባ እና ቆቆባ የተባሉት የእንጨት አይነቶች ለቆዳ ጥራትና ውበት ተመራጭ ሲሆኑ ደደሆ ደግሞ ጢሱ የቅባትነት ባህርይ ስላለውና በሰውነት ላይ ስለሚጣበቅ ቆዳን በማሣመር የተለየ ውበትና ወዝ ያጐናጽፋል፡፡
  ምስሮች የተባለው የእንጨት አይነት ደግሞ ለማህፀን በር ጥበት፣ አላስፈላጊ የሆነ የማህፀን ፈሳሾችን ለማስወገድ የሚጠቅም ከመሆኑም በላይ የወር አበባ ችግሮችን ለማስወገድ ትልቅ ጠቀሜታ እንዳለው ተጠቃሚዎችና የወይባ ጢስ አገልግሎት ሰጪዎች ይናገራሉ፡፡ በ80 ሣንቲሜትር ጥልቀት እየተቆፈረ በሚዘጋጀው የወይባ ጢስ ጉድጓድ ውስጥ እንደተጠቃሚዋ ምርጫና ፍላጐት የተዘጋጀው የወይባ እንጨት ይጨመርና ቀስ እያለ እንዲጨስ ይደረጋል፡፡ እንጨቱ በባህርይውም ቀስ እያለ ይጨሳል እንጂ አይነድም፡፡ ሴቶቹ እግራቸውን ግራና ቀኝ በጉድጓዱ ደፍ ላይ በማስቀመጥ ከጉድጓዱ የሚወጣውን ጭስ ይታጠኑታል፡፡ በወይባ ጢስ እጠና ወቅት ታጣኟ አናት ላይ ንፁህ ለጋ ቅቤ ይቀመጣል፡፡ ቅቤው ከጭሱ በሚወጣው ሙቀት እየቀለጠና በጭሱ በተከፋፈተው ገላዋ እየሰረገ ውስጧን ያርሰዋል፤ እንደ ጢስ ባለሙያዎቹ ገለፃ፡፡
  የወይባ ጢስ ተጠቃሚዋ እንደምትፈልገው የጭስ አይነትና ሁኔታ ቆይታዋም እንደሚለያይ ባለሙያዎች ይናገራሉ፡፡ ይህንን የወይባ ጢስ አገልግሎት ዛሬ ዛሬ የከተማችን ቆነጃጅትም በእጅጉ ተላምደውታል፡፡ “ባህላዊ የወይባ ጢስ ቤት” የሚል ታፔላ የለጠፉ በርካታ ጢስ ቤቶችም በራቸውን ለደንበኞቻቸው ክፍት አድርገው የሃያ አራት ሰዓት አገልግሎት እየሰጡ ይገኛሉ፡፡ በተለይ በቦሌ፣ በሃያሁለት ማዞሪያ፣ በኮተቤ፣ በጉርድ ሾላ፣ በሣሚት፣ በአያት መንደር፣ በቦሌ መድሃኒያለም፣ በወሎ ሰፈርና ጐተራ አካባቢዎች እጅግ በርካታ ጢስ ቤቶች ተከፍተዋል። እነዚህን ባህላዊ የውበት መጠበቂያ የጢስ ቤቶች የሚጐበኙና የአገልግሎቱ ተጠቃሚ ሴቶች ቁጥርም ዕለት ተዕለት እየጨመረ መምጣቱን፣ ወንዶቹም በልዩ ፕሮግራም የጢስ አገልግሎቱ ተጠቃሚ እየሆኑ መምጣታቸውን ያነጋገርኳቸው የጢስ ቤቶች ባለሙያዎች ነግረውኛል፡፡ ሰሞኑን በቦሌ መድሃኒያለም አካባቢ ከሚገኙት በርካታ ባህላዊ የወይባ ጢስ ቤቶች መካከል “ዞብል ወይባ ጢስ” የተሰኘውን ቤት ጐብኝቼ ባለሙያዎቹንና ተጠቃሚዎቹን አነጋግሬ ነበር፡፡
  ሜሮን ወደዚህ ባህላዊ ጢስ ቤት ከሚመላለሱ ደንበኞች መካከል ተለይታ ትታወቃለች፡፡ ላለፉት 3 ዓመታት ዕለተ አርብን ሳታሰልስ ወደዚሁ የወይባ ጢስ ቤት ተመላልሳለች፡፡ ምን ትልቅ ጉዳይ ቢገጥማት አሊያም ምን ቢያማት ከዚህ ሣምንታዊ ፕሮግራሟን ተናጥባ አታውቅም፡፡ ለእሷ ከዚህ በላይ አስፈላጊና ወሳኝ የምትለው ጉዳይ የላትም፡፡ የወይባ ጢስን ጠቀሜታ ተናግራ አትጠግብም፡፡ ተራዋ እስኪደርስ በእንግዳ መቀበያ ክፍል ውስጥ ተቀምጠን ጥቂት አወጋን፡፡ “የወይባ ጢስ ሱስ ነው፡፡ ከምር እንደሱስ ይሆንብሻል፡፡ መጀመሪያ ወደዚህ የመጣሁት የወር አበባዬ ለወራት ሳይመጣ በመቅረቱ ምክንያት ነበር፡፡ እርግዝና አለመኖሩን በላብራቶሪ ምርመራ ባረጋግጥም የወር አበባዬ ለአራት ወራት ያህል ሳይመጣ ቀረ፡፡ ሁኔታው አሳሰበኝ፤ ጉዳዩን ለአንዲት ጓደኛዬ ሣማክራት ወይባ ጢስ ብትታጠኚ መፍትሔ ታገኛለሽ ብላ ወደዚህ ይዛኝ መጣች፤ መፍትሔ ይሆነኛል ብዬ ባላስብም ሃሳቧን ለመሙላት ተከትያት መጣሁ፡፡ “ውጤቱን ግን ማመን አልቻልኩም፤ ገና በመጀመሪያው ቀን አመሻሹን የወር አበባዬ መጣ።
  ቀደም ሲል በወር አበባ መምጫ ወቅት የነበሩኝ ህመሞች ሁሉ አልነበሩም፡፡ በሁኔታው በጣም ተደሰትኩ፡፡ የወይባ ጢሱ የቀረ የወር አበባዬን እንዲመጣ ከማድረጉም ሌላ ጤናማና ደስ የሚል ወሲባዊ ህይወት እንዲኖረኝም አድርጓል፡፡ ስለዚህም ከወይባ ጢስ ጋር ረዘም ያለ ወዳጅነት መስርቼአለሁ፤ ላለፉት 3 ዓመታት የእረፍት ቀኔን ከመጀመሬ በፊት ወደዚህ ሥፍራ እየመጣሁ ምቾትና ውበቴን ስሸምት ቆይቻለሁ፤ ለእኔ በጣም ተስማምቶኛል፡፡” ተራዋ ደርሶ ስሟ ሲጠራ ጨዋታችን ተቋረጠ። የወይባ ጢሱ አስገኘልኝ በምትለው ጥቅምና በሰጣት መፍትሔ እጅግ ደስተኛ መሆኗን ወደጢስ አገልግሎት መስጫው ክፍል እየገባችም ነግራኛለች። በእንግዳ መቀበያው ክፍል ተቀምጠው ተራቸውን ከሚጠባበቁት ደንበኞች በርከት ያሉት በሜሮን ሃሳብ ይስማማሉ፡፡ የወይባው ጢስ ለወር አበባ ችግሮቻቸው መፍትሔ እንዳስገኘላቸው የነገሩኝ ደንበኞች ብዙ ናቸው፡፡ የወይባ ጢስ ቤቱ ባለቤት ወ/ሮ ህሊና አበጋዝም፤ ይህንኑ የተጠቃሚዎቹን ሃሳብ ታጠናክረዋለች፡፡ “የወይባ ጢስ አገልግሎቱ ከትክክለኛው ሥፍራ በሚገኝ እውነተኛ የወይባ ጢስ እንጨት የሚሰጥ ከሆነ የወር አበባ ችግሮችን ያስወግዳል፡፡
  የተዛባ የወር አበባ አመጣጥን ያስተካክላል፣ ለማህፀንና አካባቢው ህመም መፍትሔ ይሰጣል፣ የማህፀንን በር እንዲጠብ ያደርጋል፣ አላስፈላጊ የማህፀን ፈሳሾችን ጠራርጐ በማስወገድ ማህፀን ደረቅ እንዲሆን ያደርጋል፡፡ “ይህ ደግሞ ወሲባዊ ንቃት እንዲጨምርና ሴቶቹ በወሲባዊ ተራክቦ ወቅት የተሟላ ደስታና እርካታ እንዲያገኙ፤ ወንዱም የተሟላ እርካታ ያለው ወሲብ እንዲፈጽም ያስችለዋል፡፡ ለዚህም ነው ብዙ ጊዜ ወንዶች ሴቶቻቸው የወይባ ጢስ እንዲጠቀሙ የሚያበረታቱት፡፡ ብዙ ጊዜ ወደዚህ የወይባ ጢስ ቤት ሚስቶቻቸውን እየያዙ የሚመጡ ወንዶች አሉ፡፡ ጠቀሜታውን ያውቁታልና ሚስቶቻቸውን ወደ እኛ ለማምጣት አይቦዝኑም፡፡” አለችኝ። ሚስቶቻቸውን (ጓደኞቻቸውን) ለማድረስና ለመውሰድ የሚመጡ ወንዶችም፤ በወ/ሮ ህሊና አባባል ይስማማሉ፡፡ ውጭ መኪናቸው ውስጥ ተቀምጠው ሚስቶቻቸውን ከሚጠባበቁ ወንዶች መካከል አቶ ልዑልሰገድ ታምሩ፤ የሁለት ልጆቻቸው እናት ከሆኑት ባለቤታቸው ጋር ለ10 ዓመታት በትዳር ቆይተዋል፡፡
  ባለቤታቸው የወይባ ጢስ ተጠቃሚ መሆን ከጀመሩ ወዲህ “የወሲብ ፍላጐታቸው መጨመሩን ነግረውኛል፡፡ የጢስ አገልግሎቱ ስላለው ሣይንሳዊ ጠቀሜታ የማህፀንና የጽንስ ስፔሻሊስት ለሆኑት ለዶክተር ፍቃዱ ወሰንየለህ ጥያቄ አቅርቤላቸው ሲመልሱ፤ “የወይባ ጢስ እየተባለ በየአካባቢው የሚሰጠውን በእንጨት ጢስ የመታጠን አገልግሎት ሳይንሣዊ ጠቀሜታ ለመዘርዘር የእንጨቱ ወይም የጢሱ ኬሚካላዊ ምንነት በጥናት መታወቅና መረጋገጥ ይኖርበታል፡፡ ጉዳዩ ጥናት የተደረገበት ባለመሆኑ ጢሱ ጠቀሜታ አለው የለውም ብሎ ለመናገር ያስቸግራል፡፡ ነገር ግን የወር አበባ ችግሮችን ያስወግዳል እየተባለ የሚነገረው ማንኛውም በሴቷ ተፈጥሮአዊ ሥርዓተ ዑደት ውስጥ ያሉ ነገሮች ከአዕምሮዋ ጋር የሚገናኙና አዕምሮዋ በተነገረው ነገር ላይ ተግባራዊ እንቅስቃሴ የሚያደርግ በመሆኑ፣ የወር አበባዋ እንደሚመጣ በማመኗ ብቻ ሊመጣ የሚችል ጉዳይ ነው፡፡ ስለዚህ ጭሱ በማህፀን ውስጥ ገብቶ የተዘጋ የወር አበባ መምጫን በመክፈት የወር አበባ እንዲፈስ ያደርጋል የሚል እምነት የለኝም፡፡ “የማህፀን በር ያጠባል፣ የማህፀን ፈሳሾችን ጠራርጐ ያስወግዳል የተባለው ጉዳይም ሳይንሳዊ ድጋፍ የለውም፡፡ ተፈጥሮ በራሷ ጊዜ ያዘጋጀችውና በወሲባዊ ተራክቦ ወቅት የሴቷና የወንዱ ብልት እንደልብ እንዲጫወቱና ፍትጊያው የተለሳለሰ እንዲሁም በእርጥበት የተሞላ እንዲሆን የሚፈጠረውን አስፈላጊ ፈሳሽ ስለሚያደርቀው ተራክቦው ህመምና ቁስለት ያስከትላል፡፡ ይህ ደግሞ በሴቷም ሆነ በወንዱ ላይ ኢንፌክሽን እንዲፈጠርና የብልት መላላጥ እንዲከሰት ያደርጋል፡፡ ኢንፌክሽኑ በወቅቱ ታውቆ ተገቢው ሕክምና ካልተደረገለትም ለማህፀን በር ካንሰርና መሰል ከሆነ ለከፋ የጤና ችግር ሊያጋልጥ ይችላል። ስለዚህም የወይባ ጢስ የወሲብ ብቃትን ያሻሽላል እየተባለ ሴቶች ማህፀናቸውን እየከፈቱ በጢሱ መታጠናቸው ለሌሎች የጤና እክሎች አሣልፎ ይሰጣቸዋልና ጥንቃቄ ሊያደርጉ ይገባል” ብለዋል።
  AddisAdmassNews.com
  

ምስጢሩ - ፭

ወለላዬ ከስዊድን (ክፍል አምስት)
ምስጢሩ ወደኛ እየቀረበ ይሆን?
የምስጢሩን መጽሐፍ እያሳጠርኩ በመጻፍ ላይ እያለሁ ምስጢሩን የሚያጠናክር ነገር ገጠመኝ። ከወዳጄ ያሬድ ክንፈ ጋር አልፈን አልፈን ውሃ የምንጎነጭባት ቤት አለች። እንደወትሮው በዛው ቤት ተገኝተናል። አንዲት ወጣት ስዊድናዊት ልታስተናግደን መጣች። ለጓደኛዬ የሞቀ ሰላምታ ሰጠችው። ስትስቅ ጉንጭና ጉንጮቿ ላይ የሚወጡት ጎድጓዳ ምልክቶች ዓይን ይስባሉ።

"ባለፈው ጊዜ ስራ ለመቀጠር አስበሽ ያነጋገርኩሽ አይደለሽ?" አላት።

"አዎን! ተቀጠርኩ በጣም አመሰግናለሁ!"

"እኔ ምንም ያደረኩልሽ ነገር የለም እኮ"

"አንተ ሄደሽ ባለቤቱን ጠይቂው ባትለኝ አልጠይቀውም ነበር። ስለጠየኩት ተቀጠርኩ። በድጋሚ አመሰግናለሁ!" ፈገግታዋ ከጎድጓዳ ጉንጮቿ የሚረጭ ይመስላል። ተየለችን።

"ምንድነው ነገሩ? ሥራ አስቀጣሪ ሆንክ እንዴ?" ጠየኩ፤

"ባለፈው ሰሞን እዚህ መጥቼ ... ይቺ ልጅ ጎኔ ካለው ጠረጴዛ ላይ ተቀምጣ ነበር። ለጓደኞቿ እዚህ ቤት ሥራ ለመቀጠር እንደምትፈልግ አወራች። ጓደኖቿ ለንግግሯ ትኩረት አልሰጡትም፤ እኔ ጣልቃ ገባሁ። ...

"ሥራ ትፈልጊያለሽ ማለት ነው?"

"አዎን!"

"አስተናጋጅነት?"

"አዎን!"

"እዚህ ቤት?"

"አንተ ባለቤት ነህ?" ጠየቀች።

"አይደለሁም! ግን እንደምትቀጠሪ አውቃለሁ።"

"እንዴት?"

"ሂጂ ባለቤቱን ሥራ እንደምትፈልጊ ንገሪው፣ አልኳት። ነገረችው፣ ይሄው ተቀጥራ አገዃት" አለኝ።

"አንተ እንዴት እንደሚቀጥራት አወክ?"

"ምስጢሩን እኮ አነባለሁ አንዳንድ ሙከራዎችንም አደርጋለሁ። ይሄ ከስኬቶቹ አንዱ ነው" አለኝ። ስለምስጢሩ መጽሐፉን አንብቤ፣ ከመጻፌ ውጭ የምስጢሩን መከሰት በዓይኔ ያየሁትና በጆሮዬ የሰማሁት ለመጀመሪያ ጊዜ መሆኑ ነው። ምስጢሩ ወደኛ እየቀረበ ይሆን?

ወደ ዛሬው የገንዘብ ምስጢር ላምራ፤

"ገንዘብን ለመሳብ ሀብት ላይ አትኩሮት ማድረግ ይኖርብሃል።"
ጃክ ካንፊልድ
"አዕምሮህ የፀነስውን ... ያገኛል"
ደብሊዊው ኤለመንት ሥቶኝ
"የመጽሐፍ ቅዱሶቹ አብርሃም፣ ኢሳቅ፣ ያቆብ፣ ዮሴፍ፣ ሙሴና ኢየሱስ የብልጽግና አስተማሪዎች ብቻ ሳይሆኑ እራሳቸውም ሚሊኒሮችም ነበሩ። አሁን ዓለማችን ላይ ካሉ ሚሊኒሮች በላይ ሊገመት በማይችል ደረጃ የባለጸጋ አኗኗር ስልት ነበራቸው።"
ጀምስ ሬይ

የገንዘብ ምስጢር
ገንዘብን ለመሳብ ሀብትን ለመጨመር
ማጣትን ትተኸው በማግኘት ላይ አተኩር
በገንዘብ እጥረት ላይ ወስደህበት ትኩረት
ተጨማሪ ገንዘብ አትችልም ለማግኘት
ማግኘት ይገባኛል ብለህ ያልከው ገንዘብ
ከኪሴ ተቀምጧል "አለኝ!" ብለህ አስብ
ለዚህ እንዲኖርህ ተጨማሪ ስሜት
ስለ ዳበረ ሀብት ስለገንዘብ ማግኘት
ገጓደኞችህ ጋር አንስተህ ተጫወት
የማግኛ ምልከታህ እያደር ሲለወጥ
ይጀምራል መምጣት ሀብት ወዳንተ መሮጥ
በዚህ ጊዜ ደስታን እውስጥህ ማሳደር
ቀላሉ መንገድ ነው ገንዘብ ለመጨመር
ይሄንን ልገዛው በቂ ገንዘብ አለኝ
በማለት ተነሳ ትልቅ ምኞት ተመኝ
ሆኖም በመንገዱ ዝም ብለህ አትሩጥ
ገንዘብን ለማግኘት ያንተንም ገንዘብ ስጥ
ገንዘብክን ስትሰጥ ተካፍለህ ስትበላ
ዕድል ትከፍታለህ እንድታገኝ ሌላ
በዚህ ቸርነትህ እርካታ ስታገኝ
ማለት ደፍራለህ ብዙ ገንዘብ አለኝ
በመልዕክት ሳጥንህ ወይም በግልህ ባንክ
አገኛለሁ ገንዘብ በጥሬው ወይ በቼክ
የሚል ስሜትህን ምኞትህን አዳብር
የማግኘት ኃይልህን ሚዛኑን አጠንክር

 http://www.ethiopiazare.com

ምስጢሩ - ፬

ወለላዬ ከስዊድን (ክፍል አራት)

ምስጢሩ አሁን በኃይለኛ ሂደት ላይ ወቷል። እርስዎም የውለታ ምስጋናን፤ የሚፈልጉትን ነገር በዓይነ ህሊና አስቀድሞ ማየትን፤ የተግባር ኃይልን ሂደቶች የሚረዱበት ምዕራፍ ላይ ደርሰዋል ማለት ነው። ለመሆኑ አስቀድመው ይሄን ሁኔታ የተሸጋገሩ ምን ይላሉ?

"ያሁኑ ማንነታችን ያለፈው አመለካከታችን ውጤት ነው።" - ቡድሃ
"የየቀኑ ምስጋናህ ፀጋ ወደ አንተ የሚመጣበት ማስተላለፊያ ቀዳዳ ነው" - ዋላስ ዋትልስ
"መተንበይ ሁሉንም ነገር ነው። የሕይወት መጻኢ መስህቦች ቅድመ ዕይታ ነው።" - አልበርት አንስታይን

ኃይለኛው ሂደት

የምትፈልገውን አጥብቀህ መጠበቅ

ሊረዳህ ይችላል ፍላጎት እንዳይርቅ

ስትተኛም ሆነ ጠዋት ስትነሳ

በያንዳንዱ ነገር ማመስገን አትርሳ

በጅህ ባለ ነገር ማመስገን ስትጀምር

መንገድ ትፈጥራለህ ሌላ ለመጨመር

የምትፈልገውን በዓይነ ህሊና

አስቀድመህ አይተህ አስተካክለውና

ማግኘትህን አምነህ ተዘጋጅተህ ጠብቅ

ነገሩም በቅርቡ እንደሚገኝ እወቅ

በመጨረሻዋ በየአንዳንዷ ቀናት

ወደ አልጋህ ስትሄድ ሳትተኛ በፊት

ወቅትን አመዛዝነህ ያልነበረን ኹነት

አመቻችተህ እደር በምትሻው አይነት።

---

መልዕክትና አስተያየት ካለዎ
This email address is being protected from spambots. You need JavaScript enabled to view it.  
ማስታወሻ ለአንባብያን/ት፦ "The Secret" በሚል ርዕስ አውስትራሊያዊቷ ሮዳ ቢየርን ጽፋው፣ ጋሻው አባተ "ምስጢሩ" በማለት ወደ አማርኛ የመለሰውን መጽሐፍ ገጣሚ ወለላዬ የእያንዳንዱን ምዕራፍ ጭብጥ በግጥም እያስነበበን ይገኛል። መጽሐፍን አንብቦ እጥር ምጥን ባሉ ስንኞች በግጥም ማስቀመጥ በኢትዮጵያ ሥነ-ጽሑፍ ውስጥ ያልተለመደ ሥራ ነው። ምናልባትም ወለላዬ የመጀመሪያው ነው የሚል እምነት አለን።
የኢትዮጵያ ዛሬ ዝግጅት ክፍል

 http://www.ethiopiazare.com

ምስጢሩ - ፪

ወለላዬ ከስዊድን
የግጥም አፃፃፍ ዘዬን ያመጡ ነፍሳቸው ትባረክ። "ምስጢሩ ቀላል ተደረገ" የሚለውን የምስጢሩን ሁለተኛ ክፍል እነሆ! በአጭር መስመሮች ግጥም ማጠቃለል ቻልኩ። የዚህን ስራ የመጀመሪያ ክፍል ያነበቡ አስተያየት ሰጭዎች "አቀራረብህ መጽሐፉን ላነበቡ ይገባ እንደሆን እንጂ፤ ለሌላው አንባቢ ግልጽ ሊሆንለት አይችልም!" አሉኝ። ለትሁት አስተያየታቸው ምስጋናዬ ከፍ ያለ ነው።


በዚህ ምክንያት ግን ስራውን ልገታው አልፈለኩም። ቀጣዮቹ ክፍሎች የአንባቢን የመረዳት ኃይል ይጨምራሉ የሚል ግምቴ በልጦ ስለታየኝ ቀጠልኩ።

ምስጢሩ ቀላል ተደረገ
ሕገ ተፈጥሮ ነው ስበት አይወግንም
ለአንደኛው ከልክሎ ለሌላው አይፈቅድም
ነገር ግን ጉዳዩን ወደ ተሞክሮህ
ማምጣት ይገባሃል አንተ ራስህ ስበህ
መጥፎ እየተሰማህ መልካም አስተሳሰብ
ሊኖርህ አይችልም ይሄንን ተገንዘብ
እንዳተ አስተሳሰብ ተጓዳኝ ምልከታ
ባለህ ፍሪኮንሲ ስለሚይዝ ቦታ
አስተሳሰብህን አስቀድመህ አጥና
መጥፎውን በጥሩ ለውጠህ አቃና
ጥሩ ከተሰማህ የበለጠ ጥሩ
ወደ አንተ ለመምጣት ክፍት ነው አጥሩ
የምትወደው ነገር አስደሳች ትዝታ
የተፈጥሮ ውበት አስቂኝ ጨዋታ
ስሜት ፍላጎትህን አቃንቶ በማዞር
ይመልስልሃል ወደ ደህና ነገር
ይሄንን ተጠቅመህ የፍቅርን ስሜት
ማሰራጨት ከቻልክ ወደ ራስህ መክተት
የፍሪኮንሲህ ኃይል ያወጣኸው ጉልበት
የላቀ እንደሆነ አለብህ መረዳት።
http://www.ethiopiazare.com

ምስጢሩ - ፩

ወለላዬ ከስዊድን
"The Secret" በሚል ርዕስ አውስትራሊያዊቷ ሮዳ ቢየርን ጽፋው፣ ጋሻው አባተ "ምስጢሩ" በማለት ወደ አማርኛ የመለሰውን መጽሐፍ በአድናቆት አነበብኩ። ምስጢሩ ... "ወዳንተ የሚመጣውን ማንኛውንም ነገር ወደ ሕይወትህ የምትጎትተው አንተው ነህ" ይለናል። አዎን! በእርግጥ ብዙዎች ምስክርነት ሰጥተውበታል። ይህም በመጽሐፉ ላይ ተካቶ ይገኛል። መጽሐፉ በአስራ አንድ ርዕሶች የተከፋፈለ ነው። ከዛ ውስጥ የመጀመሪያውን ዕርስ ማጠቃለያ ፍሬ ሀሳብ፤ በግጥም ስሠራው እንዲህ እንሶና ጭምቅ ብሎ ወጣልኝ። ለወገኖቼ ባካፍልስ ብዬ አሰብኩ፤ ወደናንተም ላኩት። ሁለተኛው ርዕስና ሌሎቹም ይቀጥላሉ።

የተከሰተው ሚስጢር
ሕይወት ለመለወጥ፤ የተገኘው ሚስጢር፤
ስበት እንደሆነ፤ አውቀህ ሕጉን ተማር።
የፈለከው ነገር፤ ወደ ዓለም ተልኮ
የልብህን ምኞት፤ ያመጣዋል ማርኮ።
ከ'ንግዲህ ሕይወትህን፤ ካሻህ ለመለወጥ
መስመሩን አስተካክል፤ ፍሪኮንሲ ምረጥ።
አንተው ነህ ለራስህ፤ ኃይል ማሰራጫ
ጎትተህ አቅራቢ፤ የሕይወትህን ምርጫ።
ስለዚህ ከዓለም፤ ሁሉን እንድታገኝ
በስበት ተማምነህ፤ ደህና ነገር ተመኝ።
አሁን ለምነግርህ፤ ለዚህ ለምስጢሩ
የመረጃው ብዛት፤ በርካታ ነው ቁጥሩ።


 http://www.ethiopiazare.com

ወሬ ነጋሪው (መሐመድ ይማም ግምገማ) – በልጅግ ዓሊ

ወሬ ነጋሪው

መጽሐፍ         ወሬ ነጋሪ ደራሲ            መሐመድ ይማም ግምገማ          በልጅግ ዓሊ

በሚያዚያ ወር የሰሜን አሜሪካ ክረምት ገና ሙሉ በሙሉ ሳይለቅ በፊላደልፊያ ከተማ ውስጥ  በማይታወቅ ሰው ኢትዮጵያዊቷ ጀግና ተገደለች። በምሳ ሰዓት አካባቢ ወደ ቤት የተመለሰችው እህቷ ጠዋት በሰላም የተለየቻትን በደም አበላ ውስጥ ተዘፍቃ አገኘቻት። ፖሊስም ጠራች። የፍላደልፊያ ፖሊስ ይህንን የተቀነባበረ ግድያ የፈጸመውን ወንጀለኛ መያዝ ስላቃተው እንቆቅልሹ ያልተፈታ በሚል መዝገቡን ዘጋ።

ይህች ጀግና ሴት በአንድ ወቅት አንድን ትውልድ ያንቀሳቀሰ ትግል ውስጥ የጎላ ሚና ነበራት ። ታሪኳ ሲተረክ የጅግኖች ጀግና፣ የኢትዮጵያውያን ሴቶችን ሁሉ የሚያኳራ ተግባር እንዳከናወነች እንኳን ወዳጆቿ ጠላቶቿም ቢሆኑ አይክዱትም። ከአዲስ አበባ እስከ አሲምባ በተለያዩ የሚፈትኑ ተግባሮች ለቆመችለት ዓላማ ታማኝ ሆና፣ የኢትዮጵያን ሕዝብ በማስቀደም፣ ለግል ጥቅሟ ሳትቆም፣ አለ አንዳች ፍርሃት ተወጥታዋለች።

በዚያ ቀውጢ ሰዓት በቀይ ሽብር ወቅት  በኢሕአፓ ውስጥ ከማደራጀት ሥራዋ ሌላ በወቅቱ ተወዳጅ የነበረችው የጎህ መጽሄት ዋና አዘጋጅ ነበረች። ይህች እህት የፈጸመችውን ገድሎች ሁሉ በጽሁፍ ለማቅረብ ዱካዋን በጥልቀት መመርመር ያስፈልጋል። ዛሬ በሃገራችን ለነጻነትን ለመብት በተደረገው ትግል ውስጥ እንደተሰውት ዜጎችየእሷም ስም በወርቅ ቀለም ተጽፎ ይገኛል።

መዝገብነሽ አቦዬ ሲዳሞው ውስጥ የተሰዋው የኢሕአፓ ብርቅዬ የሌላው ጅግና የብርሃኑ እጅጉ ባለቤትና የአንድ ልጅ እናት ነበረች።

“የእሷ መሞት ነው ሕይወት አጭር መሆኗን አስረድቶኝ ይህንን “ Wore Negari’’ ወሬ ነጋሪ’ የተባለውን መጽሐፍ ከማውቀውና ከሰማኋቸው ያሰባሰብኩትን ጨምሬ ለመጻፍ ያነሳሳኝ’’ ይላል መሐመድ ይማም  የ“Wore Negari’’ ደራሲ። እውነትም ነው ይህች ጀግና የስነ ጽሁፍ ጠበብት ለትውልድ የሚጠቅም ታሪክ እንደያዘች በጩቤ ተዘክዝካ ተገድላለች። እውነት ነው ከምትወዳት ልጇ ጋር ሳትገናኝ አድብቶ በጠበቀ ጠላት ባልተዘጋጀችበት ወቅት ተጠቅታለች። እውነት ነው ያ ጓዶቿን የጨረሰውን አረመኔ መንግሥት መጨረሻ ሳታይ ተቀድማለች።

መሐመድ ይማም ወደ ተማሪዎች ትግል ከዛም ወደ ኢሕአፓ እንዴት እንደገባ በመጽሐፉ ላይ አስፍሮታል። እንዴት ወደ ጎህ ጋዜጣ አዘጋጅነት እንደተላለፈ አሳውቆናል። በቀይ ሽብር ወቅትም የደረሰበትን ፈተና ለመግለጽ ሞክሯል። ይህንን ለወሬ ነጋሪ ከተረፈው ግለሰብ የቀረበልንን ትረካ ማመን አስቸጋሪ ሆኖ አግኝቸዋለሁ። በተለይ በቀይ ሽብር ወቅት የተፈጸመውን።

መሐመድ ይማም ለወሬ ነጋሪ የተረፈው ተአምራዊ በሆነ ሊታመን በማይቻል ሁኔታ ከእስር ቤት በማምለጤ ነው ይለናል። የሰጠን አምንክዮ ግን አንባቢያንን ሊያሳምን የሚችል ሆኖ አላገኘሁትም። መሐመድ ፒያሳ ከሚገኘው በወቅቱ ሐጂ በመባል የሚታወቀው አረመኔ ከሚያስተዳድረው እስር ቤት ውስጥ አለ እንዳች ቅድሚያ ስምምነት ለማምለጥ መቻሉን ለማመን እንቸገር ይሆናል። ለመሆኑ  ሐጂ ማነው?

ሐጂ በቀይ ሽብር ወቅት ፒያሳንና አካባቢውን ያንቀጠቀጠ፣ ብዙ ወጣቶችን እንደገደለ የሚታወቅ አረመኔ ነበር። ሐጂ ከሰራቸው አሰቃቂ ተግባሮች ውስጥ የሚጠቀሰው አንድ ቀን ፒያሳ ላይ ከአብዮት ጥበቃዎች ጋር ሲዞር አንድ ራቁቱን የሚሄድ እብድ እየፈሩ ሰዎች ሲሸሹ ይደርሳል። እብዱን ሁለተኛ እዚህ ሰፈር እንዳትደርስ በማለት ጥይት ተኩሶ አስፈራርቶ ያባርረዋል። በሌላ ቀን ሐጂ በመኪና ሲሄድ እብዱን እዛው አካባቢ ያገኘዋል። እብዱ ትዕዛዙን ባለመስማቱ ተናዶ “እብድና እባብ ጭንቅላቱን ካልመቱት አይሞትም’’  በማለት በጥይት መትቶ ይገድለዋል። ይህ ተግባር  አዲስ አበባ ውስጥ ተፈጸሙ ከተባሉት ሁሉ ግፎች ሁሉ ገዝፎ የታየበት ወቅት ነበር።

አረመኔው ሐጂ  የፓርቲው የዞናል ኮሚቴ(በወቅቱ ትልቅ ስልጣን የነበረ) አባልና የጎሕ መጽሄት አዘጋጅ ለሆነው መሐመድ ይማም ሃዘኔታ ተሰምቶት ምንም ዓይነት ግርፋትና ሥቃይ ሳያደርስበት፣ እንዲያጋልጥም ሳያስገድደው መቅረቱ ነው አመኔታ እንድነፍገው ያስገደደኝ። ትርክቱ ቀጥሎ ሐጂ መሐመድ የነገረውን ሁሉ አምኖ ወደ እስር ቤቱ ምንም ሳያደርስበት ተመለሰ።  ከሁለት ሳምንት በኋላም ከእስረኞች ጋር ተቀላቅሎ በአንድ አብዮት ጥበቃ ብቻ ታጅበው ሽርሽር ወጡ ። በዛው ግን አልተመለሰም። ቀስ ብሎ አብዮት ጥበቃው ለሌሎቹ መሣሪያውን ሲያሳይ መሐመድ ከእስር ቤት አምልጦ ወደ ተክለሐይማኖት ነጎደ። ማመን ወይም አለማመን?!!!! እዚህ ላይ ነው ጥርጠሬን የሚጭረው። ለመሆኑ በቀይ ሽብር ወቅት እንደ መሐመድ ዓይነት ከፍተኛ የፓርቲው አባላት እንዲህ በቀላሉ ነበር እንዴ የሚመረመሩት? እኔ እስከማውቀው ድረስ፣ እስከ አሁንም ከተጻፉት መጽሐፍት እንደተረዳነው ምርመራው የከበደና የጠለቀ ነበር። የመጨረሻው ቀይ ሽብር(ከዛም በኋላ ተደርጎ ይሆናል) እንደ ኢትዮጵያውያን አቆጣጠር 1976 ከመሐመድ ያነሰ ስልጣን በነበራቸው ላይ መካሄዱን በቅርብ ከተጻፉት መጽሐፍት ተረድተናል። መሐመድ ይማም ይህንን ሁኔታ በመጽሐፉ ላይ ታአማኒነት ባለው መልክ አላስረዳንም።

ይህንን አፈ ታሪክ እንኳን በቀይ ሽብር የነበረ ሰው ወይም ስለቀይ ሽብር የሰማ የሰሞኑም ሕጻን አያምነውም። የማይታመን ድርጊት እመኑ ሲለን ግን የሚታመን ዕውነታ እየሸሸገን ይመስላል። መሐመድ ይማም የታሰረበትን ሁኔታ ሲተርክ ባጭሩ እንዲህ ይላል፡ -

ቀይ ሽብር በተጧጧፈበት ወቅት መሄጃ ስላልነበራቸው ፒያሳ አካባቢ ከሚገኝ አንድ የቤት ቁሳቁስ መሸጫ ውስጥ አምስት ሆነው ለማደር ይስማማሉ። በወቅቱ አስሳ ስለነበር ምንአልባት አብዮት ጥበቃዎች ቢመጡ መሸሻ መንገዳቸውን ተነጋግረው መሣሪያ ይከፋፈላሉ። በዚህ ወቅት ደራሲው መሣሪያ እንደማይፈልግ ግልጽ ያደርጋል። እንደጠረጠሩት ከተኙ በኋላ አብዮት ጥበቃዎች መጥተው ያንኳኳሉ። አምስቱም ተነስተው ዝግጅት ያደርጋሉ። መሸሽ ሲጀምሩ ከመካከላቸው አንደኛው ቦንብ ጥሎ አንዱን አብዮት ጥበቃ ይገድላል። ከአምስቱ ሁለቱ ሊያመልጡ ሲሞክሩ ይገደላሉ።በዚህ ወቅት አንዱ  ሆዱ ላይ ተመትቶ ስለነበር ብዙ ይደማ ነበር። ቦንቡን የጣለውን ዛፍ ላይ ተደብቆ አግኝተው አብዮት ጥበቃዎቹ ይገድሉታል። ደራሲው ከተደበቀበት ቦታ ይያዛል። ወደ መኪና ሲወስዱት ሆዱን የተመታውን ተይዞ ያገኘዋል። እሱም ደራሲው ከእነርሱ ጋር መሆኑን ያጋልጣል። ይህ የቆሰለው ወጣት እዛው ቀይ ሽብር ይወሰድበታል። በእንደዚህ አይነት ከአምስቱ ደራሲው ብቻ ለወሬ ነጋሪ ይተርፋል። ከዚህ በኋላ ደራሲው በጣም በመፍራቱ ምክንያት የሆነውን ብዙም አያሳታውስም። ከሦስት ቀን በኋላ ነፍስ ያውቃል። ምንም ጉዳት እንዳላደረሰና በማንኛውም ጉዳይ አብዮቱን እንደሚቀበል ይናገርና ካለ ስየል(ቶርቸር) ፣ ካለ ቃለ መጠይቅ ይድናል።  . . .

ይህንን አፈ ታሪክ ለማመን ይከብዳል። ወቅቱ ምን እንደነበር ለሚያውቅ ሰው የመሐመድ ይማም ከማስገረም አልፎ የደበቀው ጉዳይ እንዳለ መጠርጠሩ አይቀርም። “የአንድ ጓድ ነፍስ በሺህ አናርኪስቶች ደም ትለወጣለች’’ ተብሎ በሚፎከርበትና በተግባር በሚፈጸምበት ወቅት፣ አንድ ሰው የኢሕአፓን ወረቀት ይዘሃል ተብሎ በሚገደልበት ወቅት፣ መሐመድ ይማም የፓርቲው ዞናል ኮሚቴ አባል የጎሕ መጽሄት አዘጋጅ፣ መሣሪያ ከታጠቁ ግለሰቦች ጋር አብሮ የነበረ፣ መሣሪያውን በመጠቀም አንድ አብዮት ጥበቃ ከገደሉት ውስጥ አንዱ፣ ሳይገረፍ፣ ሳይጠቁም፣ መዋቅሩን ሳያጋልጥ፣ ሌሎችን አሲይዞ ሳያስገድል በነጻ “በቃ ተወው የኔ ልጅ ደግ አደረክ። ሌላ ቀን አይልመድህ’’ ተባልኩ ብሎ አፈ ታሪክ ሲተርክ የሚያምን ካለ የሐጂንና የሌሎቹን የሕይወት ታሪክ የማያውቅ ብቻ ነው። ይህ የመሐመድ አፈ ታሪክ ለማመን ያዳግታል። ማመን ብቻ ሳይሆን በዚህ ጽሁፍ ሊደበቅ የሚሞከር ሌላ እውነት እንዳለ እየጎላ ይታይበታል።

ከዚህ በማያያዝ መሐመድ አደገኛ እስረኛ ከሚባሉት ውስጥ ሳይቆጠር ከሌሎቹ እስረኞች እንደነበር ስንሰማ መሐመድ ለነ ሐጂ ከሚገባው በላይ ታማኝ እንደነበረ መጠርጠራችን አይቀርም። በተለይ መሐመድ እንዴት ከእስር ቤት እንዳመለጠ ሲተርክ በአንድ አብዮት ጥበቃ ለሽርሽር ከወጡ በኋላ እንደው ሳይሮጥ ቀስ ብሎ በመዝናናት መጥፋቱን እንድናመነው ያደረገው ሙከራ የሚገርም ቴያትር ነው። ጥሩ ልብ ወለድ ይመስላል። ማምለጡንስ ያምልጥ እንመን ከዛ በኋላ ለመደበቅ የሄደበት ቦታ ሁሉ ከእሱ ከመታሰሩ በፊት ተጋልጠው የነበሩ ቦታዎች ሲሆን ምንም አደጋ ሳይደርስበት በነጻው ዓለም ሲንደላቀቅ እንደነበረ ነው የሚጽፈው። የጠቀሳቸውን ቦታዎች ለምናውቅ ሰዎች ያስደምመናል። ሲኒማ ራስና አደሬ ሰፈር እንኳን በቀይ ሽብር ወቅት ከዛም በኋላ የማይደፈር ነበር።

ከዚህ ተነስተን ሙሉ የመጽሐፉን ይዘት ስንመረምረው መሐመድ በግል የሚረብሽውን ጉዳይ በውሽት ብዛት ለመወጣት የሚደርገው ጥረት እንዳለ መረዳት አያዳግትም። ቀን ይጠብቃል እንጂ ለወሬ ነጋሪ እኔ ብቻ ተረፍኩ እንዳለው እንደማይሆን እርግጠኛ መሆን ይቻላል። ሌላ የውስጡን የሚያውቅ ብቅ ሊል ይችላል። በተለይ እሱ በመጥፋቱ ምክንያት የተገደሉት አሥራ አንድ የኢሕአፓ አባላት እንዴትና ለምን እንደተገደሉ የተሰጠ ማብራሪያ የለም። ይህም ቢሆን ወደፊት ታሪኩ መጻፍ ይኖርበታል። የቴያትሩ መጋረጅ ተዘግቶ እውነተኛው ታሪክ እንዲገለጥ በገጉት እንጠብቃለን።

ከመጽሐፉ አንድ ትልቅ ቁም ነገር አገኘሁበት። እንዲህ ይላል፡ -

Nothing happened to me that day. It was the longest day of my life. I was completely shook up. I was terror stricken. I remember some of the prisoners saying I must not be the leader in the organisation. Since I was so scared. And scared I was.

መሐመድ የሚለን በጣም ፈርቼ መርበትበቴን ያዩ ሌሎች እስረኞች የድርጅቱ መሪ ልትሆን አትችልም አሉኝ ነው። እስረኞቹ ስንት ጀግና በተመለከቱበት እስር ቤት ከፍርሃት የተነሳ ሽንት ቤት ይሆን፣ እስር ቤት፣ የማይለይን ሰው እንደ ድርጅት መሪ መቀበል ቢያቅታቸው የሚገርም አይሆንም። እኔም መጽሐፉን አንብቤ ከጨረስኩ በኋላ የተሰማኝ ይህንኑ ነው። እውን መሐመድ የፓርቲው አባል ነበር? የሚለው ጥያቄ ነው ጭንቅላቴ ውስጥ የተመላለሰው። በዚህ ዓይነት ፍርሃት ስንት ሰው አጋልጦ በቀይ ሽብር እንዲመቱ አድርጓል? ከእነዚህ ውስጥ ስንቶቹ ናቸው ንጹሐን? መሐመድ በሌላ መጽሐፍ ይገልጽልን ይሆን? እጠራጠራለሁ።

መሐመድ ይህ ሁሉ ጥፋት የኢሕአፓ ነበር ብሎ ለማሳመን የደረገውን ጥረት የሚገርም ነው። ይህ አቋሙ የአሁን ይሁን የዛን ጊዜ ለማመን ያዳግታል። ይህ ሁሉ ተቃውሞ በፓርቲው ላይ ከነበረው ለምን ከእነ ብርሃነ መስቀልና ከነ ጌታቸው ማሩ ጋር አልሆነም? መንገዱ ጠፍቶት ይሆን?  ይህም በመጽሐፉ ውስጥ መልስ ተፈልጎ የማይገኝበት ነው።  በእንደሱ ዓይነት ትልቅ የፓርቲ ስልጣን ላይ ነበርኩ ያለ ጥፋቱን ካልተቀበለ ማነው ጥፋተኛ ታዲያ? ከነበረው ኮሚቴ ለወሬ ነጋሪ የቀረው እሱ ብቻ ስለሆነ እንደፈለገ ሁኔታው ቢያጣምመው የሚያስተካከል እንደሌለ መሐመድ የገመተ ይመስላል። መሐመድ ይህንን መጽሐፍ ሲጽፍ በወቅቱ ከእሱ ጋር በኮሚቴ የሠሩ ባይኖሩም ከጠቅላላው ሁኔታ ተነስተን የመሐመድን ሕይወት ያተረፈው ምን እንደሆነ መገመት አያዳግተንም። መሐመድም የዛን ትውልድ አባላት ችሎታ የሚፈታተን ጥያቄ እንዳላነሳ ሊረዳው ይገባል።

ለማጠቃለል ያህል መዝገብነሽ ፍላደልፊያ ከመሞቷ በፊት ደራሲው ስልክ ደውላ አንድ ሰው በባቡር ፍላደልፊያ መግባቱን ነግራኝ ነበር፣ ስትነግረኝም ጭንቀት ነበረባት ይላል። ለመሆኑ ያ ሰው ማነው? ይህንን ጉዳይ ለፖሊስ አስታውቆ ነበር? ካላስታወቀስ የመዝገብነሽ ገዳይ እስከ አሁን ነጻ የሆነው በዚህ ምክንያት  ቢሆን ኅሊናው እንዴት ይቀበለዋል? መሐመድ ይህንንም በሚመለከት ስለ መዝገብነሽ ሞት የተደበቀውን እንቆቅልሽ ይፈታው ይሆን? ስለ መዝገብነሽ ሞት የሰጣቸው ግምቶች ዛሬ በመጽሐፉ ውስጥ ሊያስተባብል ከሚሞክረው ታሪክ ጋር የተያያዘ ይሆን? እውነት ለመናገር የሚፈራው ጉዳይ ይኖር ይሆን?

መጽሐፉ ብዙ ጥያቄዎች ፈጥሮ አልፋል እንጂ መልስ የለውም። ሐቁን ከሌሎች እናነብ ይሆናል። መሐመድም ድፍረት አግኝቶ፣ ከፍርሃቱ ተላቆ እውነቱን ያስረዳን ይሆናል። ማን ያውቃል?

ስለ ሕዝብ ትግል ሲሉ ስለተሰዉ የሚያስቡ ሁሉ በሰላም ይክረሙ ።

በልጅግ ዓሊ

Beljig.ali@gmail.com

zehabesha

የተስፋዬ ገ/አብ የስደተኛው ማስታወሻ መጽሐፍ ሙሉው ይኸው (PDF)

ጋዜጠኛ ተስፋዬ ገብረአብና የስደተኛው ማስታወሻ የተሰኘውን መጽሐፍ ያሳትመዋል የተባለው ነፃነት አሳታሚ ድርጅት በመጨረሻ ሊስማሙ ባለመቻላቸው ተስፋዬ ገብረአብ መጽሐፉን በነፃ ለሕዝብ እንደሚያስነብበው በፌስቡክ ገጹ በገለጸው መሰረት መጽሐፉ በPDF ተሰራጭቷል። መጽሐፉን ለማንበብ ለምትፈልጉ ይህን ይጫኑ።

አጤ ምኒልክና ኢጣሊያኖች

“The Study of history is the best medicine for a sick mind!”

Livy 

 የታሪክ ጥናት ለሕሙም አእምሮ ፍቱን መድኃኒት ነው።
በእደ ማርያም እጅጉ ረታ

 ኢትዮጵያ ጥንታውያን ከሚባሉት ሀገሮች አንዷ ስትሆን፣ ከአምስት ሺህ ዓመት ያላነሰ ታሪክ አላት።
በእነዚህ ዘመናት፣ ቀደምት አባቶቻችን ሠርተው፣ ትተውልን ካለፉት ሥራዎች መካከል የአክሱም
ሐውልት፣የላሊበላ ቤተ መቅደስ ሕንፃዎች፣ የጎንደር ቤተ መንግስቶች ለምስክርነት የሚጠቀሱ ናቸው።
ባለፉት በእነዚህ ዘመናት ሀገራችን የእርስ በርስ ጦርነትና ከውጭ በመጡ ወራሪዎች፣ ብዙ ቅርሶች
ወድመዋል፣ የሰዎች ሕይወት ጠፍቷል። ከእዚህ ሁሉ ፈተና በኋላ፣ በዐሥራ ስምንተኛውና ዐሥራ
ዘጠነኛው ምዕት ዓመት፣ ሀገራችን ዘመነ መሳፍንት በመባል የሚታወቀው ጊዜ ውስጥ ገባች። ያ ወቅት
ደግሞ አውሮጳውያን አፍሪቃን እንደ ቅርጫ ሥጋ ለመከፋፋል ወስነው ዘመቻቸውን የጀመሩበት ወቅት
ነበር።
በዚያ ወቅት፣ ይህች በዘመነ መሳፍንት አገዛዝ ኀይሏ የተዳከመችውን ሀገር መልሶ አንድ ለማድረግ፣
የቋራው አንበሳ ካሣ ኀይሉ፣ በኋላ ዳግማዊ ዐጤ ቴዎድሮስ ተብለው የነገሡት ተነሡ። ዐጤ
ቴዎድሮስም በእነዚህ መሳፍንት ላይ በመዝመት ድል አድርገው፤ ሀገራችን ኢትዮጵያ ተመልሳ እንደ
ቀድሞው አንድ እንድትሆን መንገዱን ከፈቱ። ባደረጉትም ዘመቻ፣ አንድም ቀን ድል ሆነው
የማያውቁት ንጉሠ ነገሥት፣ ከአውሮጳውያኑ ጋር በተፈጠረው ችግር፣ የእንግሊዝ ጦር እስረኞቹን
ለማስፈታት በዘመተባቸው ጊዜ፣ እጃቸውን ለወራሪው ጦር መስጠትን እንደ ውርደት ቆጥረውት
መቅደላ አፋፍ ላይ ሽጉጣቸውን ጠጥተው የክብር ሞትን ጽዋ ተቀብለዋል።
ይሁን እንጂ፣ ዐጤ ቴዎድሮስ ከሞቱ በኋላ የተነሡት ነገሥታት እሳቸው የጀመሩትን ዓላማ በመከተል
ኢትዮጵያ ተመልሳ አንድ እንድትሆን አድርገዋል። ከዐጤ ቴዎድሮስ ቀጥለው የነገሡት ዐጤ ዮሐንስ
4ኛ ሲሆኑ፣ በእሳቸው ዘመን የሸዋው ንጉሥ ምኒልክ እና የጎጃሙ ንጉሥ ተክለ ሃይማኖት

 በዝርዝር ያንብቡ

ሕሊና አይረታም

ሕሊና አይረታም

( ለመታችና አስመታቾች በሙሉ)

ሞግተህ ላትረታው ሕሊናህን ክደህ፣

በጻድቅ ምላስህ ውስጥህን ደብቀህ፣

እባብነትህን በእርግብ ላባ ከድነህ፣

እጅግ በጠለሸው በነወረ አእምሮህ፣

ቅዱስ ነኝ ትላለህ መላዕክ ነኝ ትላለህ፣

ይህ ጭራቅነትህ አይገለጥ መስሎህ፡፡

በወርቅ የለበጥከው ያ ቀፋፊ ልብህ፣

የማታ የማታ ሲገፈፍ ጭምብልህ

መገለጡ አይቀርም ያ የውስጠህ ሲኦል፣

ያለፍክበት ሕይወት ያደለብከው በደል፡፡

በስውሩ ሴራህ ወዳጅህ ሲቃትት፣

ቃልህ አይዞህ ይላል እጅህ መርዝ ሲግት፡፡

እንዲህ ሆኖም ሞቶ በመቃብሩ ላይ፣

ያዘነ ለመምሰል ለሰዎች እንዲታይ፣

ደረት ትደቃልህ ፀጉር ትነጫለህ፣

ጮቤ እየረገጠ እየሳቀ ውስጥህ፡፡

መቼም ለአንተም አትቀር ያቺ የቁርጥ ቀን፣

ዋጋህ መሰፈሩ በሰራህው መጠን፡፡

ጭራቅነትህን ቀድመህ አስብበት፣

ሕሊና አይረታም ዝንተአለም ቢሞገት፡፡

ዮ. ሠርፀ (J. Sertse), 2001 ዓም

D.Sertse Desta

በቀጣዩ ወር ለመንግሥት የልማት ድርጅቶች ሠራተኞች ሌላ ዙር የቤት ምዝገባ ሊካሄድ ነው

በፀጋው መላኩ ሰንደቅ ጋዜጣ

የአዲስ አበባ ከተማን የመኖሪያ ቤት እጥረት በዋነኝነት በጋራ መኖሪያ ቤቶች ግንባታ ለማቃለል ካለፈው ሰኔ ወር ጀምሮ ምዝገባ ሲካሄድ የቆየ ሲሆን በመስከረም ወርም 2006 ዓ.ም ሌላ ዙር የቤት ምዝገባ የሚካሄድ መሆኑ ታውቋል።
የ2005 በጀት ዓመት የኮንስትራክሽንና የከተማ ልማት የእቅድ አፈፃፀምን አስመልክተው ባለፈው ቅዳሜ መግለጫ የሰጡት የኮንስትራክሽንና የከተማ ልማት ሚኒስትሩ አቶ መኩሪያ ኃይሌ በመስከረም ወር ተጨማሪ የመኖሪያ ቤት ተጠቃሚዎች ምዝገባ የሚካሄድ መሆኑን አስታውቀዋል። ምዝገባው በመንግስት የልማት ድርጅቶች ውስጥ በሥራ ላይ ያሉ ሰራተኞችን ተጠቃሚ የሚያድርግ ነው። የቤቱ አይነት 40/60 ሲሆን በሰራተኞቹ ስም ሙሉ ክፍያውን እንዲፈፅም የሚደረገው ሰራተኞቹ የሚሰሩበት የልማት ድርጅት ነው። የልማት ድርጅቶች በእያንዳንዱ ተመዝጋቢ ስም መቶ ፐርሰንት የቤቱን ዋጋ መክፈል የሚጠበቅባቸው ሲሆን ሰራተኛው በአንፃሩ ከሚሰራበት የልማት ድርጅት ጋር በሚፈጽመው ውል መሰረት በወር የሚከፍለውን የገንዘብ መጠን በተመለከተና በሌሎች ዝርዝር ግዴታዎችና መብቶችን ለይቶ እንዲያውቅ ይደረጋል።
እንደ አቶ መኩሪያ ገለፃ የልማት ድርጅቶቹ ከሰራተኞቻቸው ጋር ይገባሉ ተብሎ ከሚጠበቁት ውሎች መካከል በልማት ድርጅቶቹ አማካኝነት የቤት ልማት ተጠቃሚ ለመሆን የተመዘገቡ ሰራተኞች የአገልግሎት ጊዜ ነው። እንደ ሚኒስትሩ ገለፃ አንድ የልማት ድርጅት በሰራተኞቹ ስም የቤት ልማት ገንዘብን መቶ ፐርሰንት ክፍያን ሲፈፅም አሰሪና ሰራተኛው በሚገቡት ውል መሰረት ሰራተኛው መሥሪያቤቱን ለተወሰኑ ዓመታት ለቆ ሳይሄድ የማገልገል ግዴታ ይጠቅበታል።
ይሁንና አንደ ሰራተኛ ቤቱን ተረክቦ ከገባው ውል ውጪ የቤት ባለቤት ያደረገውን የልማት ድርጅት ለቆ ቢሄድ ግለሰቡ በየወሩ የከፈለው ገንዘብ እንደኪራይ ተቆጥሮ ቤቱን እንዲለቅ የሚደረግ መሆኑን አቶ መኩሪያ አመልክተዋል። መመሪያው እየተዘጋጀ መሆኑ የተመለከተ ሲሆን ከመስከረም 15 እስከ መስከረም 30 ቀን 2006 ባሉት ቀናት ምዝገባውን ለማከናወን ቅድመ ዝግጅቶች እየተጠናቀቁ መሆናቸውን ሚኒስትሩ ጨምረው አመልክተዋል። የመንግስት የልማት ድርጅቶች በመንግስት ይዞታ ስር ሆነው በትርፍ ሥራ ላይ የተሰማሩ እንደ ኢትዮጵያ አየር መንገድ፣ ኢትዮ ቴሌኮም፣ ንግድ ባንክና የመሳሰሉት ድርጅቶች ናቸው።

 http://news.yehabesha.com

አሉላ አባ ነጋ