የነፍስ ስደተኞች (the immigrants of survival)

ባገሩ የሚኮራ ፤ ሀገሩን አፍቃሪ

ለወገን ሟች ስፍሱፍ ፤ አብሮነት ዘማሪ

የነፍስ ስደተኛ ፤ እውነት አስመስካሪ

የሀገሩ ነገር ፤ የወገኑ እጣ

ሁሌ የሚያስጨንቀው ፤ ሲበዛ ግፍ ጣጣ

ስለተገለለ ፤ አማራጭ ስላጣ

እኛን ካልሆንክ ተብሎ ፤ ሕሊናው ተሸጣ

ደሞ ስለተገፋ ፤ ታይቶ እንደ ባላንጣ

አላፈናፍን ተብሎ ፤ ጅቡ እየተቆጣ

አላቃምስ ተብሎ ፤ በራብ እየተቀጣ

ወገን ሲለይበት ፤ ሆኖ ዘር መረጣ

ቢብሰው ተነሣ ፤ ለስደት ጎረፈ

ከሞት ጋር ተፋጦ ፤ ሞትን እያለፈ

ግፍ እየተጋተ ፤ እየተቀሰፈ

ገና ባልጸናለት ፤ በጨቅላ ትከሻ

ስንት ስቃይ ዐየ ፤ የጣር መጨረሻ

ወገኑን እያጣ ፤ የዓሣ ሲሳይ ሆኖ

በአራዊት ተበልቶ ፤ በድንገት ታድኖ

ስለተደፈረ ፤ እራሱን ኮንኖ

በራብ በውኃ ጥም ፤ እየቀረ ደብኖ

በኢሰብአዊ ግፍ ፤ በአውሬ አረመኔ

ለኩላሊት ልቡ ፤ ታርዶ በጭካኔ

ከዚህ የተረፈው ፤ ሲደርስ ያ ወገኔ

ከገባበት ሀገር ፤ ተአምር እያስጻፈ

ጎኑን ሳያሳርፍ ፤ ሳይዝ የተረፈ

አንቀው ሊመልሱት ፤ እየተጠረፈ

ባዶ እጁን ሊጥሉት ፤ እየተገፈፈ

ሊይዙት ሲያሳዱት ፤ ሲሮጥ እየከነፈ

ሀገር እንደጠላ ፤ እንደተጸየፈ

መመለስን ጠልቶ ፤ ዋ! ተንገፈገፈ

ወደ ሲዖል ባሕር ፤ እንደሚጣል ቆጥሮ

ለማምለጥ ሲሯሯጥ ፤ በነፍሴ አውጭኝ በሮ

ከገሃነም ጭፍራ ፤ ጽድቅ ከጨነገፈ

ትናንትን ከረሳ ፤ ነገን ካከሸፈ

ሊያመልጥ ሲበረግግ ፤ ዋ! ተንዘፈዘፈ

መንገድ ላይ ወደቀ ፤ ተደነቃቀፈ

በእሳት ጥይት አረር ፤ እየተገረፈ

የሞት ስደተኛው ፤ እየሮጠ ዐረፈ

ስንትን ሞት ተሻግሮ ፤ ሊያልፍለት አለፈ

ባዶ እጀን አልሄድም ፤ ቃሌ ካልሠመረ

አላሳፍራትም ፤ ብሎ እንደፎከረ

በናፍቆት ተቆልቶ ፤ ፍቅሯን እያዜመ

ተደፍቶ ቀረላት ፤ አስከሬን ተመመ

የሚታደግ አጥቶ ፤ ታፋሪ ተፈሪ

የኛ ብሎ የሚለው ፤ መንግሥት ተቆርቋሪ ፡፡

ሀገር እርምሽን አውጭ ፤ ይብቃሽ ይቅር ምጡ

እናት አባት ወገን ፤ ሐዘን ተቀመጡ

ሳተና ልጆችሽ ፤ የአንችን ቀን ሊያመጡ

መልሰው ላያዩሽ ፤ ቀሩ እንደወጡ  ፡፡

ኅዳር 3 / 2006 ዓ.ም.

amsalugkidan@gmail.com

goolgul